Però amicuzzi faciti un inchinu, prima a la fimmina chi è a vui vicinu …

Eccovi il testo (I caddozzu) originale della contradanza siciliana. La buona riuscita di questa danza è affidata al maestro che la guida e alle dame e cavalieri che prendano al volo i suggerimenti per i vari passi. E’ consigliabile che i danzerini la leggano prima per seguire gli ordini del maestro in tempo reale. Non è il testo completo perché abbiamo altre due versioni (una di Alcamo e l’altra di Mazzara ) che seguiranno. Ora sta al maestro eseguire i vari caddozzi, mischiarli e personalizzarli.  Però amicuzzi faciti un inchinu, prima a la fimmina chi è a vui vicinu …

I° CADDOZZU

O fimmini sciacquati e tisi

Omini beddi,bravi e curtisi,

Facemu tutti 'na granni rota,

'Na cuntraddanza cu vota e svota:

Mittemu subitu sta rota avanti

Cu 'na quadrigghia la cchiù brillanti;

Però, amiciuzzi , faciti un inchinu

Prima a la fimmina chi è a vui vicinu,

Poi accuminciati , signuri cari,

Vutannu a dritta senza stancari

A manu manca vutannu puru

Canciari è beddu mossi e figuri .

O fimmineddi , vutati arreri,

Vutati tutti, gran cavaleri;

Cchiù di 'na soggira sugnu siccanti,

Vutassi arreri stu gran vulanti.

Ora facemu lu valanzè,

Facemu tutti lu turdimè

E doppu chistu ,picciotti beddi,

Purtamu a spassu li cumpagneddi

E iemu sempri pi a stessa via,

Canciamu donna,pi curtisia.

Lassamu a chista cchiù picciuttedda:

Chista di ccà è donna di sfrazzu,

Damucci tutti lu nostru vrazzu;

Chist'autra avanti stidda è di luci,

Biata a chiddu chi la cannuci!

Lassamu a chista ch'è grossa grossa,

Pigghiamu a chista ch'è tutta ossa

Ed è chist'autra donna frizzanti

Prestu picciotti , passamu avanti!

'Un vogghiu fari sta vista cchiui

è nta 'na vota nni canciu dui.

Ora, signuri, cuntrè facemu

Picchì stancuzzi , sudati semu,

Canciamu sempri pi nostri beni

Picchi li fimmini su 'guai e peni;

Canciamu ancora sempri girannu ,

Picchì li donni sunnu malannu,

Chista è 'na fimmina ca 'un ridi mà:

Prestu, canciamula pi carità!

Lassamu a chista tipu modernu

Chi tutti l'omini voli a lu 'nfernu;

Adaciu vaiu e poi accussì

Stavolta ,amici, nni canciu tri.

Lassassi ognunu qualunqui amica:

Doppu sta vesta lu beddu è

Di fari tutti lu turdimè,

Lu turdimè sulu nun stà,

Facemu tutti lu cumprimà.

II °CADDOZZU

Furmati , o fimmini , 'na roticedda,

Giramu a dritta nni sta vanedda ;

Furmati, o omini, cu mossa franca

'Na granni rota girannu a manca

E ogni rota accussi com'è

Vutassi subito a lu cuntrè:

O fimmineddi, vutati arreri ,

Vutati tutti , gran cavaleri.

Attinzioni, si vi sbagghiati

Vi dicu surdi, malagurati:

Sutta li vrazza d'ogni bidduzza

'Nfilassi ognuna la sò cucuzza,

Sta gran catina farria un divariu

Vutassi subitu a lu cuntrariu,

Sta cosa a l' omini tutti nun va

Picchì si persi di dignità.

Ora vui fimmini , cu abbutta abbutta,

Bisogna mettiri 'a testa sutta:

Nun mi piaci st'ammutta ammutta,

Donni, livativi di staci sutta

E a dritta e a manca comu 'na vota,

Girassi ognuno subitu a rota.

Ogni damuzza accussi com'è

Furmassi subitu lu mulinè :

Vui di la dritta fimmina iti

Omini tutti contra faciti

E di li donni 'a stessa via

Siguiti , o omini , pi curtisia.

I cavalieri sunnu 'n doviri

Di a so dama 'a manu offriri:

'A manu manca è manuzza affritta

Damuci tutti 'a manu dritta,

Manu manuzzi comu 'na vota

Furmamu ancora 'a granni rota

E di la dritta giramu tutti,

Chissa è la stada chi dà boni frutti;

Si di stu latu troppu stancamu

A manu manca prestu vutamu.

Ora , signuri , senza gran chiassu

Purtati tutti 'a donna a spassu ,

Marciati tutti dritti e sciancati

Sinu a li purti di la citati,

Tirati avanti lu tempu è beddu

Sinu a li mura d'un gran casteddu :

Cci iti boni pi caminari

Centu chilometri l'avemu a fari.

E ora amici doppu sta prova

Si resta ognunu come si trova ,

Facci cu facci viniti ccà

Facemu tutti lu cumprimà,

Cu 'na'annacata la cchù eliganti

N'arreri l'omini li donni avanti:

E ora fimmini turnati arreri

Ca vemu appressu li cavaleri,

Facemu ancora la stissa cosa ,

Viniti appressu cummari Rosa :

Turnati ancora, pò nni firmamu

Picchì ,signuri , accussì stancamu,

Ora sintiti chiddu chi dicu

Di cavaleri ,di bon'amico:

Attinzioni , nun vi sbagghiati!

III° CADDOZZU

Manu manuzzi li vrazza all'aria,

Fimmini e omini di frunti e frunti

Furmati tutti lu cchiù gran ponti

E ogni coppia pò, 'ncutta 'ncutta

Di chistu ponti passassi sutta.

Ccà 'na firmata avemu a fari

Pi nun sudari e pi nun stancari ;

Mentri ogni fimmina pigghia di ddà

Giramu l'omini tutti di ccà,

Picchì cci semu picciotti 'n vena ,

Furmamu tutti la granni scena.

No cchiù la manu , ma cu gran sfrazzu

Damu a la dama lu nostru vrazzu.

Attinzioni ,accussì com'è

Vota ogni coppia  di lu contrè;

Doppu sta scena mi pari opportunu

Chi lu sò posto pigghiassi ognunu.

Ora signuri , cu gran rispettu,

La dama ognunu pigghia a brattezzu:

Gran cosi duci ddà dintra cc'è,

Tutti 'nvitati semu a buffè.

Ancora amici la terza vota

Furmamu tutti la granni rota,

Giramu a dritta , giramu a manca

Picchì nissunu di nui si stanca,

E sta gran rota, accussì com'è

Girassi ancora di lu cuntrè.

Sempri ristannu stu gran vulanti

E adaciu adaciu,cari amiciuzzi ,

Pigghiassi ognunu li so 'manuzzi

Cu 'n'annacata di gran 'mpurtanza,

Lesti facennu 'na gran valanza.

Sintiti tutti lu me cumannu :

Canciati donna sempri girannu,

Canciati ancora, canciati arreri

Canciati tutti ,gran cavaleri:

Lassati a chista, chist'autra puru

Chist'autra ancora, bravi signuri;

Adaciu vaiu, iemu accussi

Lestu sta vota nni canciu tri .

Senza bisogno di lu me cumannu

Oro canciati sempri girannu,

Lassassi ognunu qualunqui amica

E ripigghiassi la dama antica.

E ora, amici, mittemu puntu

Ca di stanchizza ognunu è gghiuntu

E pi finiri, accussì si fà,

Facemu tutti li cumprimà.

Ora assittativi tutti cuntenti ,

Grazi dicennumi militarmenti

E vui la dama, bravi signuri,

Ringraziati di tantu onuri.

ps ha collaborato Chiara Rao